Домашние молитвы. На все случаи жизни и на каждый день

Молитвы в продолжение дня

Молитвы перед выходом из дома

Молитва святителя Иоанна Златоуста

Отрица́юся тебе́, сатано́, горды́ни твое́я и служе́ния тебе́, и сочета́юся Тебе́, Христе́, во и́мя Отца́, и Сы́на, и Свята́го Ду́ха. Ами́нь (и осенить себя крестным знамением).

Иная молитва

Огради́ мя, Го́споди, си́лою Честна́го и Животворя́щаго Твоего́ Креста́ и сохрани́ мя от вся́каго зла.

Го́споди, напра́ви ко бла́гу путь мой.

Го́споди, благослови́ все мои́ вхожде́ния и исхожде́ния (и осенить себя крестным знамением).

Молитва перед принятием пищи

О́чи всех на Тя, Го́споди, упова́ют, и Ты дае́ши им пи́щу во благовре́мении, отверза́еши Ты ще́друю ру́ку Твою́ и исполня́еши вся́кое живо́тное благоволе́ния.

Молитва после принятия пищи

Благодари́м Тя, Христе́ Бо́же наш, я́ко насы́тил еси́ нас земны́х Твои́х благ; не лиши́ нас и Небе́снаго Твоего́ Ца́рствия, но я́ко посреде́ ученико́в Твои́х прише́л еси́, Спа́се, мир дая́й им, прииди́ к нам и спаси́ нас.

Молитва перед началом всякого дела

Царю́ Небе́сный, Уте́шителю, Ду́ше и́стины, И́же везде́ сы́й и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Благослови́, Го́споди, и помоги́ мне, гре́шному, соверши́ть начина́емое мно́ю де́ло, во сла́ву Твою́.

Го́споди, Иису́се Христе́, Сы́не Единоро́дный Безнача́льнаго Твоего́ Отца́, Ты бо рекл еси́ пречи́стыми усты́ Твои́ми, я́ко без Мене́ не мо́жете твори́ти ничесо́же. Го́споди мой, Го́споди, ве́рою объе́м в души́ мое́й и се́рдце Тобо́ю рече́нная, припа́даю Твое́й бла́гости: помози́ ми, гре́шному, сие́ де́ло, мно́ю начина́емое, о Тебе́ Само́м соверши́ти, во и́мя Отца́, и Сы́на, и Свята́го Ду́ха, моли́твами Богоро́дицы и всех Твои́х святы́х. Ами́нь.

Молитва перед выходом в Интернет

Го́споди Бо́же наш, Тво́рче не́ба и земли́, созда́вый челове́ка и дарова́вый ему́ ве́дение сокрове́нной прему́дрости, во е́же прославля́ти и́мя Твое́, горе́ и до́лу Ты еси́, Твое́ есть ночь и Твое́ есть день, не утая́тся пред Тобо́ю да́же мимоле́тные движе́ния мы́сли. И ны́не молю́ Тя, от вся́каго греха́ сохрани́ мя, приступа́ющаго к рабо́те с хитроумным творе́нием ру́к челове́ческих, проникающим во вся концы́ земли́. Огради́ о́чи мои́ и ум мой от вся́ких нечи́стых и блу́дных образо́в, от пусты́х и негодных слове́с. Укрепи́ во́лю, се́рдце очи́сти, не даждь ми вотще́ расточа́ти вре́мя жи́зни моея́, и от вся́каго расслабления и уны́ния изба́ви. Да бу́дут дела́ на́ши во сла́ву Твою́! Ами́нь.

Молитва по окончании дела

Исполне́ние все́х благи́х Ты еси́, Христе́ мой, испо́лни ра́дости и весе́лия ду́шу мою́ и спаси́ мя, я́ко еди́н Многоми́лостив, Го́споди, сла́ва Тебе́.

Досто́йно есть я́ко вои́стину блажи́ти Тя Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Призывание помощи Духа Святаго на всякое доброе дело

Тво́pче и Созда́телю вся́ческих, Бо́же, дела́ pук на́ших, к сла́ве Твое́й начина́емая, Твои́м благослове́нием спе́шно испpа́ви, и нас от вся́каго зла изба́ви, я́ко еди́н всеси́лен и Человеколю́бец.

Ско́рый в заступле́ние и кре́пкий в по́мощь, предста́ни благода́тию си́лы Твоея́ ны́не и благослови́в, укрепи́, и в соверше́ние наме́рения блага́го де́ла рабо́в Твои́х произведи́: вся бо, ели́ка хо́щеши, я́ко Си́льный Бог, твори́ти мо́жеши.

Благодарение за всякое благодеяние Божие

Сла́ва Отцу́, и Сы́ну, и Свято́му Ду́ху, и ны́не и при́сно и во ве́ки веко́в. Ами́нь.

Благода́рни су́ще недосто́йнии раби́ Твои́, Го́споди, о Твои́х вели́ких благодея́ниих, на нас бы́вших, сла́вяще Тя хва́лим, благослови́м, благодари́м, пое́м и велича́ем Твое́ благоутро́бие, и ра́бски любо́вию вопие́м Ти: Благоде́телю Спа́се наш, сла́ва Тебе́.

Твои́х благодея́ний и даро́в ту́не, я́ко раби́ непотре́бнии сподо́бльшеся, Влады́ко, к Тебе́ усе́рдно притека́юще, благодаре́ние по си́ле прино́сим, и Тебе́ я́ко Благоде́теля и Творца́ сла́вяще, вопие́м: сла́ва Тебе́, Бо́же Всеще́дрый.

Богородичен

Богоро́дице, христиа́ном Помо́щнице, Твое́ предста́тельство стяжа́вше раби́ Твои́, благода́рно Тебе́ вопие́м: ра́дуйся, Пречистая Богоро́дице Де́во, и от всех нас бед Твои́ми моли́твами всегда́ изба́ви, еди́на вско́ре предста́тельствующая.

Молитва ко Господу

Благодари́м Тя, Го́споди Бо́же наш, о всех благодея́ниих Твои́х, я́же от пе́рваго во́зраста до настоя́щаго в нас, недосто́йных, бы́вших, о и́хже ве́мы и не ве́мы, о явле́нных и неявле́нных, я́же де́лом бы́вших, и сло́вом: возлюби́вый нас, я́коже и Единоро́днаго Твоего́ Сы́на о нас да́ти изво́ливый. Сподо́би и нас досто́йны бы́ти Твоея́ любве́. Даждь сло́вом Твои́м му́дрость и стра́хом Твои́м вдохни́ кре́пость от Твоея́ си́лы, и а́ще что хотя́ще или́ не хотя́ще согреши́хом, прости́, и не вмени́ и сохрани́ ду́шу на́шу свя́ту, и предста́ви ю́ Твоему́ престо́лу, со́весть иму́щу чи́сту, и коне́ц досто́ин человеколю́бия Твоего́. И помяни́, Го́споди, всех призыва́ющих и́мя Твое́ во и́стине: помяни́ всех, бла́га или́ сопроти́вная нам хотя́щих: вси бо челове́цы есмы́, и всу́е всяк челове́к. Те́мже мо́лимся Тебе́, Го́споди: пода́ждь нам Твоего́ благоутро́бия ве́лию ми́лость.

Молитвы на сон грядущим

Молитва ко Господу нашему Иисусу Христу

Го́споди Иису́се Христе́, Сы́не Бо́жий, ра́ди честне́йшия Ма́тере Твоея́, и безпло́тных Твои́х А́нгел, Проро́ка же и Предте́чи и Крести́теля Твоего́, богоглаго́ливых же апо́стол, све́тлых и добропобе́дных му́ченик, преподо́бных и богоно́сных оте́ц, и всех святы́х моли́твами, изба́ви мя настоя́щаго обстоя́ния бесо́вскаго. Ей, Го́споди мой и Тво́рче, не хотя́й сме́рти гре́шнаго, но я́коже обрати́тися и жи́ву бы́ти ему́, да́ждь и мне обраще́ние окая́нному и недосто́йному; изми́ мя от уст па́губнаго зми́я, зия́ющаго пожре́ти мя и свести́ во ад жи́ва. Ей, Го́споди мой, утеше́ние мое́, И́же мене́ ра́ди окая́ннаго в тле́нную плоть оболки́йся, исто́ргни мя от окая́нства, и утеше́ние пода́ждь души́ мое́й окая́нней. Всади́ в се́рдце мое́ твори́ти Твоя́ повеле́ния, и оста́вити лука́вая дея́ния, и получи́ти блаже́нства Твоя́: на Тя бо, Го́споди, упова́х, спаси́ мя.